霍宏聲香港頭馬紀錄

印像中係霍宏聲在港第一場平頭冠軍，唔知有冇記錯呢？ 今仗未段直路鈄跑，阻到人，聲仔被罰停賽一個賽馬日，唔知聲仔會否選擇返其家鄉走一回？ 頭場五班谷1650米，又跑出平頭冠軍。直路最後階段，手風大順的奧爾民，臨住「神駒馬靈」攝入內欄，本已反壓大熱門「龍又生」出頭，以為可以先到終點，殊不知最後50米，外欄落班的「榮耀盛甲」加速力好強，快鏡睇雖然差一步，但慢鏡再睇，佢係同「神駒馬靈」一齊到線，兩邊馬主各自有頭馬拉，皆大歡喜喇~廖康銘近期少贏馬，今晚贏到第37W，落後方仔5W，至於游達榮就贏到季內第20W，奧爾民則連勝4日，頭馬升到23W。 https://racing.hkjc.com/zh-hk/local/information/localresults?racedate=2026/03/18&Racecourse=HV&RaceNo=1

霍宏聲時隔3季再於煞科戰取得頭馬，為容天鵬送上一個美滿、別具意義的頭馬。 馬季煞科頭場五班谷1200米，最後一日練馬的容天鵬，即刻有收山馬！配上霍宏聲的「伶俐驫駒」，藉慢步速擺前前之利，頂埋最後一步事隔2年多再開勝門，賽後見到容天鵬、容太同容女一齊現身，呢場頭馬相好有意義呀！反而爭告東尼獎的潘明輝，騎住「快樂奇兵」差一步追唔到，未能甩開蔡明紹同梁家俊，有暗湧呀。是場跑第3、4名，係「花好月盈」同「讓愛高飛」。 容天鵬話艾兆禮今場或有另一坐騎未能上陣，所以搵到霍宏聲策騎，賽前預料步速唔太快，「伶俐驫駒」抽7檔起步，都希望隻馬可以放得出，今場霍宏聲放得出之餘步速操控好，贏馬感到高興。今日都係自己最後一日派馬出賽，心情比以往輕鬆，因為以往壓力較大，有時跑完都要同馬主交代，但今日已經係最後一日，能夠有頭馬進帳當然開心，亦都有特別意義，希望稍後時間繼續取得頭馬。 https://racing.hkjc.com/racing/information/Chinese/Racing/LocalResults.aspx?RaceDate=2025/07/16&Racecourse=HV&RaceNo=1

天火同人搏失唔緊要，霍宏聲爆冷贏祥勝力駒將功幫過，亦為今季騎練合作首場頭馬。 第7場四班谷1200米，外面衝一批馬大行其道，其中韋達馬房的「祥勝力駒」，雖然留到差不多包尾，但霍宏聲搵位跑線堪稱完美，最終力克亞軍「天外迎天」及季軍「領航財子」，爆出46倍大冷而回，今晚韋達起孖贏完13倍「新幹線」再執埋呢W，大豐收呀，難怪賽後見到韋達同女友錫個靚嘴Sweet吓先喇~ 贏到29w的韋達，話「祥勝力駒」今場贏馬唔算感到驚喜，因為隻馬之前成日形勢唔好，今日抽外檔起步反而仲幫咗隻馬，因為今場留後，剛巧遇上有步速場合，隻馬一路跑得好順，因為隻馬有時搶口就會失去競逐意欲，有步速佢會好好跑。練者都坦言隻馬係有啲難跟進，但只要佢遇到今場咁好嘅形勢佢係會有表現。 https://racing.hkjc.com/racing/information/chinese/Racing/LocalResults.aspx?RaceDate=2025/07/09&Racecourse=HV&RaceNo=7

近期霍宏聲明顯手風欠順，今仗終憑銀河勇士，飛到馬到，打破接近一個月悶局。 第2場四班田草1000米，上次同程敗於全熱門「駿馬之曲」的「銀河勇士」，今回排3檔但好快切入帶頭，雖然霍宏聲騎住沿途帶得頗快，但拉士仍然貫注，頂住後勁凌厲的亞軍「金滙千帥」及季軍跟前的潘頓初出馬「官金騏」，在港打開勝利之門。 贏到第17W暫時壓下徐雨石擺脫榜尾，丁冠豪話「銀河勇士」上場安排跑直路，其實本身來港後，轉彎一直有外閃毛病，可能同佢响外地因為倒圈訓練為主有關，經過一連兩場，馬匹顯然發揮咗最佳速度，雖然出閘跳一跳，因為馬匹去到閘前仲好緊張，至於係咪場地起變化有幫助，因為雨勢唔算大，實際唔算太淋地，相信呢匹馬跑好地以至乾快場地都咪問題，至於係咪變化地會好啲，仲要有待印證。 https://racing.hkjc.com/racing/information/Chinese/Racing/LocalResults.aspx?RaceDate=2025/07/01&Racecourse=ST&RaceNo=2

上仗巴閉仔直路掟出大外檔都閃閃身追近，今仗輕鬆順利補中。 第8場三班田草1400米，大熱係掛頭牌的蔡廐「神馳」，不過今場排13檔又頂在三疊，雖然布文已經好努力慢慢湧上，直路更一度出頭，可惜135磅頂唔到尾，畀威哥匹12倍冷門「巴閉哥」趕過，呢隻霍宏聲坐騎，早兩場響1600米練完氣，今次縮程排1檔慳位，直路移出來望空，拉士衝贏對手取下今季首W。是場跑第3、4名則為外欄後上「本領輝煌」及最大冧巴的「定數」。 贏到45W嘅呂健威，話「巴閉仔」季初因健康問題而耽誤進度，而今年1月做咗個喉部手術，其實就係想改善會厭被覆蓋情況，所以今季較遲復出，而「巴閉仔」曾於1400米取得兩捷，回師首本路程結果可為馬主交出頭馬，非常高興。 https://racing.hkjc.com/racing/information/chinese/Racing/LocalResults.aspx?RaceDate=2025/06/08&Racecourse=ST&RaceNo=8

上場配見習生被練馬師直指跑法錯誤，今仗霍宏聲人馬故劍重逢，輕鬆取勝。 上次在黃寶妮胯下留住驚搶口唔放的「飛輪步」，掀起馬迷茶餘飯後話題，呢隻容廐馬今次又跑田草1600米，換上聲仔成為11倍半冷，排8檔起步，呢鋪唔留喇，而係沿途拍住「天威」放，走得好舒服冇搶口，結果在呢個盲門路程出頭，今次仲要係贏逾2乘，證明黃寶妮剛剛真係跑錯咗，有時點拗都冇用，賽果已證明一切，下次跑好啲就得喇，人係要向前望的。 容天鵬終止5期不勝局面，今季第17W到手，至於鞍上人霍宏聲，今日就起個孖，頭馬數字升到43W，是場跑第2、3名，係外欄後上的「君子傳承」及50倍冷門「瑞祺威楓」。 https://racing.hkjc.com/racing/information/Chinese/Racing/LocalResults.aspx?RaceDate=2025/05/31&Racecourse=ST&RaceNo=5

霍宏聲在港至今賠率最熱勝出頭馬，只有1.35倍。 第5場四班田草1400米，上次初跑此程新勝的「一定超」，孭到135磅仍然成為1.3倍全熱門，結果呢隻馬沿途居中，直路衝上來壓下16倍冷門「時尚歡欣」取得連勝，至於跑第3、4名則為中段加速透出5的52倍大冷門「金運來」及走馬林衝唔順的「一定掂」。 贏到29W的游達榮，話「一定超」今場沿途守好位，末段交出強勁衝刺，馬匹不斷進步，3歲孭頂磅贏到，顯示此駒有唔錯嘅前景，會傾向讓「一定超」抖暑，準備下季。 https://racing.hkjc.com/racing/information/Chinese/Racing/LocalResults.aspx?RaceDate=2025/05/31&Racecourse=ST&RaceNo=5

霍宏聲今場做好自己！ 第5場四班田草1400米，3隻馬「喵喵怪」、「仁仁有餘」同「做好自己」熱晒，結果得1隻入到Q。由蔣嘉琦引入的呂廐馬「做好自己」，霍宏聲一路騎住擺前面Box Seat位，直路偷個靚位竄上來，輕鬆力壓同是跟前的「嘉應駿昇」贏馬，在港跑到第9仗開齋，賽後嘉琦都有孖住霍宏聲同師傅呂健威拉頭馬呀。是場跑第3、4名，就係攝內欄慳晒位的「新力驕」及「精明選擇」，另外黃智弘騎「仁仁有餘」直路閃入阻到「喵喵怪」成隻抽起，可能有手尾跟。 起孖贏到44W的呂健威，表示「做好自己」現時仍有脾氣，此駒不太受騎師操控，稍留會岳頭，所以上次就加交叉鼻箍。「做好自己」今季跑多咗，受惠評分下調，今次終打開勝門，現階段都係會以1400米路程為主。 https://racing.hkjc.com/racing/information/chinese/Racing/LocalResults.aspx?RaceDate=2025/05/25&Racecourse=ST&RaceNo=5

人和家興爆29倍冷W，八歲馬取得服役第九場頭馬，霍宏聲季內第40W到手。 馬主張明敏8歲愛駒「人和家興」，今季初爆過22倍，估唔到嚟到季尾仲有貨交，是晚佢孖住霍宏聲出戰第7場三班谷1200米，直路同外面的潘頓1.6倍擂台躉「安康萬里」單打獨鬥，雖然一度下風，但聲仔終點前打番佢上來，贏到服役第9捷，仲要冷到29倍，賽後見到張明敏開心到手舞足蹈呀。是場跑第3、4名為後上的「樂勝天下」及布文坐騎「無限美麗」。 希斯話「人和家興」喺佢重返香港首季服役，跑到依家仲有咁好成績，為此老馬感到驕傲，今場「安康萬里」步步進逼，但「人和家興」展現鬥心力頂到底，霍宏聲發揮應記一功。練者透露，「人和家興」好大機會跑埋今季就退役，希望今季佢仲交到表現。 https://racing.hkjc.com/racing/information/chinese/Racing/LocalResults.aspx?RaceDate=2025/05/21&Racecourse=HV&RaceNo=7

今次轉換跑法，留住衝一段亦得，輕取得手，人馬合作取得連捷。 「小橋流水」昔日贏盡短途大賽，更曾遠征英國捧走金禧錦標，馬主高金沛養馬運真係好好，到依家高生又有好馬接棒喇，名下「小鳥天堂」一出即勝後，今日第2次上陣熱到2.6倍，藉快步速之助直路霍宏聲在外欄狂追，又以近2馬位之先到終點，唔止為高生捧走香港傷健策騎協會50週年盃，仲幫丁仔今日起孖贏夠14場，今季成功畢業喇~跑第2、3名，則為內欄竄上的「海藍寶」及連場入圍的「快樂高球」。 丁冠豪表示「小鳥天堂」上場放頭贏馬用多咗力，賽前試閘刻意教留後，雖然馬匹陣上仍然稚嫩，不過進步幅度大，加上第2段步速快幫到手，結果今場可克服檔位贏馬，相信此駒以文靜方式策騎表現更佳。而今場終可達標上岸，丁冠豪寄望頭馬可陸續有來。 https://racing.on.cc/news.html?articleId=bknrac-20250510161317901-0510_01002_001

飲勝，霍宏聲及大衛希斯尾場飲得杯落。 近期多番近而未勝的「飲杯」，今晚憑住1檔慳位，直路初再攝個空檔上來，擊敗亞軍大熱門潘頓後上馬「安康萬里」及季軍11倍半冷「無限美麗」，今次仲贏逾2乘添！至於「信和」系平時鮮見拉頭馬，今晚卻是一大棚人出現，而鞍上人霍宏聲第38W到手，仍留港未走的霍利時，又在賽後露面，當然又再一次錫寶貝仔一啖喇~ https://racing.hkjc.com/racing/information/Chinese/Racing/LocalResults.aspx?RaceDate=2025/05/07&Racecourse=HV&RaceNo=9

一定超頭兩場1200米姍姍來遲，今日增程1400米大熱勝出，霍宏聲獲父親霍利時與及親友入場打氣。 資深馬迷應該記得方祿麟以前嘅「一定威」，呢隻何壽南、何志豪名下的棕黑色馬，94年曾經爆冷贏出香港打吡，而今日「一定威」馬主何壽南之子何志豪，亦都有同樣來自新西蘭的棕黑色的「一定超」跑第9場四班田草1400米，呢隻游廐新貴直路在外欄逢馬過馬，衝一段22秒32輕勝亞軍「勁沙塵」同季軍「凱旋幸運」，再睇馬款真係超級靚仔，又睇吓可唔可以成為「一定威」2.0喇。 霍宏聲今日有馬贏，現時身在香港嘅前練馬師霍利時，都響馬場呀，今次老竇又錫囝囝，聲仔咁大個都仲畀你錫，開心喇霍老爺！而贏到第25W嘅游達榮，指「一定超」交出強勁嘅追勢，沿途都好放鬆，雖然跑姿仲有少少稚嫩，但因為此駒經驗唔夠，所以有呢啲都好正常。至於「一定超」之後會增程跑一哩，今季會唔會再跑，會視乎馬匹恢復情況，或者會直接畀馬匹抖暑，讓牠成長。

光明傳承借助快步速之利，沿途一步不蝕，今場終於得手。霍宏聲為自己打破一季贏馬最多紀錄，首次為葉楚航馬房建功。 葉楚航馬房「光明傳承」自從上季爆出165倍巨冷W之後，連敗12場，不過今仗終於喺轉配備之下，喺霍宏聲胯下後上爆出10倍獨贏，似乎呢匹23/24葉楚航練馬師賽馬團體嘅愛駒，真係識睇電算機喎！ 賽後，葉楚航表示「光明傳承」喺四班有利，但需要檔位幫手，之前幾次抽到外檔焗住留後啲，今次抽到2檔可以咬前啲跑，加上賽前預計係慢步速，但第2段可以開到21秒97，就知道隻馬有機會。至於今仗初戴鼻箍，練者指係因為霍宏聲上星期喺從化試閘後，匯報馬匹適應得好好，叫佢繼續用呢個配備。 https://racing.hkjc.com/racing/information/Chinese/Racing/LocalResults.aspx?RaceDate=2025/04/20&Racecourse=ST&RaceNo=4

  時隔3個月與廖康銘攜手贏馬，取得今季第35場頭馬，平了前季個人頭馬最多紀錄。 「決一劍」休息3個幾月後今晚復出，雖然臨場周身大汗，賠率亦頗冷落，但無損威力，喺霍宏聲胯下爆出12倍冷門，廖康銘呢口孖寶大蝕水！今場跑第2名為布文「光輝所願」，賀銘年「洛河」跑第3，第4名為潘明輝「廚神」，潘頓大熱門「天下寵兒」不放而留倒灶。 賽後，馬主蘇堅偉表示「決一劍」上場跑完沙田之後情緒唔太好，所以放個悠長假期重新出發，呢啲都係騎練功勞，隻馬上場跑沙田走勢唔穩定，抖咗3個月有足夠體力，現時喺跑馬地重新贏馬，現階段都係跑谷草較好，今場贏馬都係預計之中，相信仲有分喺手，而且隻馬仲係好BB。至於點解會幫隻馬改名做「決一劍」，蘇生話港隊喺奧運要有一個金牌已經唔容易，劍擊項目仲贏到兩個金牌，希望改呢個馬名勉勵香港人。 https://racing.hkjc.com/racing/information/Chinese/Racing/LocalResults.aspx?RaceDate=2025/04/16&Racecourse=HV&RaceNo=7

朗日雪峰智借助場地之利，一放到底，霍宏聲連續四場頭馬都係靠放頭食糊。 今日頭場開出正路賽果，霍宏聲策騎方嘉柏馬房「朗日雪峰」，起步後立即搶放，超過千二磅巨獸靠大步就此一放到底，打開在港勝利之門，鍾易禮大熱門「傳承者」跑第2，一對落飛馬串成11倍大熱連贏。今場跑第3名為潘明輝「威威父子」，梁家俊「武林至尊」跑第4。 賽後，方嘉柏表示「朗日雪峰」仲係一匹未成熟嘅賽駒，花咗一段時間去調教，好多謝馬主有耐性，贏完今場之後應該會留喺五班，希望隻馬持續有表現，回報馬主。 https://racing.hkjc.com/racing/information/Chinese/Racing/LocalResults.aspx?RaceDate=2025/04/09&Racecourse=HV&RaceNo=1

初出13檔照樣放到，唯今場對手水平唔高，算力有待驗證，騎練季內合作成功取得第二場頭馬。 丁廄「小鳥天堂」今日(3月30日)初出，在第四場跑四班田草1200米，結果在霍宏聲胯下沿途領放，在末段更力拒賀銘年騎的「特別美麗」來犯贏馬，此駒一出即勝，表現出色。 賽後，丁冠豪指「小鳥天堂」試閘一再展現速度，潛力相當唔錯，而呢個種氏以踏入4歲較佳，今仗跑起嚟比試閘緊張，前中段因為要殺埋嚟，上口急咗，所以末段稍弱之下贏得驚險，騎師亦話馬匹競逐心智仲係好稚嫰，會有大幅進步空間。 馬主高金沛表示「小鳥天堂」與「小橋流水」出自同一馬販購入， 「小鳥天堂」有唔錯嘅前速，不過仍然稚嫩，寄望日後成就可以超越「小橋流水」。 https://racing.hkjc.com/racing/information/Chinese/Racing/LocalResults.aspx?RaceDate=2025/03/30&Racecourse=ST&RaceNo=4

輕鬆放返，霍宏聲與伍鵬志合作，取得久違的勝利。 頭場五班泥1800米，大熱門「精明選擇」今場出閘冇耐已搶到頭，之後中段雖然放得幾快吓，但入直路韌力持續，在霍宏聲胯下輕勝，騎者剛打吡留到「祝願」極後飲恨，今日一開波即刻贏番馬振士氣，至於跑第2、3名，係外欄追好多的「星雲浩騰」及馬林中塞咗一輪的艾兆禮坐騎「大利好運」。 贏到35W嘅伍鵬志，表示「精明選擇」跑咗好多次第2，經過眾多出賽經驗後，認為馬匹最緊要走得順同埋唔可以拖慢，相信此駒放頭跑法會最好，因為如果隻馬跟步速走就會自己放棄唔肯走，雖然此駒近仗泥地表現佳，但未來日子都會安排佢重返草地，因為佢草地都上過名。 https://racing.hkjc.com/racing/information/Chinese/racing/LocalResults.aspx

轉換跑法，一放絕塵，贏取騎練合作第三場頭馬。 希斯馬房「環球英雄」在港9戰全部三甲不入，但近仗已有接近走勢，今仗轉戰田草1200米，起步後霍宏聲立即騎出放頭，貼欄愈走愈勁，就此一放到底，為馬匹打開勝利之門。一對落飛馬跑獲亞軍及季軍，分別為第2名為布文「夢幻駿駒」，艾道拿「伶俐驫駒」跑第3，奧爾民大熱門「全神貫注」只跑第4。 賽後，希斯話「環球英雄」好似喺香港跑咗好耐咁，但其實只因為2歲就嚟到香港，此駒現時只係3歲，相信未來日子成長後，表現會更好。「環球英雄」係1400米馬，日後應會增程。「環球英雄」今仗出閘爽快，霍宏聲順勢領放主宰步速，結果藉主動優勢一放而回，表現令人滿意。 https://racing.hkjc.com/racing/information/Chinese/Racing/LocalResults.aspx?RaceDate=2025/03/15&Racecourse=ST&RaceNo=1

上仗贏完TVB盃賠率，今場賠率仍然好分，霍宏聲繼續幸運有您！ 羅富全馬房「幸運有您」上仗回師一班賽即回復真本色，喺霍宏聲胯下贏馬，今仗原班人馬再戰一班賽，結果以8.9倍再下一城連捷，呢匹上季喺一級賽兩度入Q嘅7歲馬，戰鬥力真係未退化。今場跑第2名為奧爾民「合夥奔馳」，田泰安大熱門「飛鷹翱翔」跑第3，第4名為黃寶妮「綠族無限」。 賽後，羅富全話「幸運有您」今仗都係同上仗相若對手跑，只係由1檔變成7檔，不過霍宏聲熟隻馬，會發揮到，賽前預呢場有快馬，都係搵遮擋跑，今場贏馬後加分要跑番分級賽。羅富全話「幸運有您」已經7歲，唔想跑咁密，要睇馬匹狀態先決定跑唔跑3月30日1200米二級賽短途錦標。 https://racing.hkjc.com/racing/information/Chinese/Racing/LocalResults.aspx?RaceDate=2025/03/09&Racecourse=ST&RaceNo=8

聲仔首次贏香港直路1000米賽事，時隔一季再與方嘉柏攜手進入凱旋門，快蝦王首仗顯露不俗潛質。 今日頭場四班1000米直路賽水準唔高，果然兩匹初出馬包辦連贏。方嘉柏馬房「快靚旺」喺霍宏聲胯下一放到底，以2.6倍大熱門身份贏馬，呢匹三冠馬王「正義」嘅子嗣以55秒67完成比賽，係今季最快嘅田草1000米完成時間。 賽後，方嘉柏表示「快靚旺」來港日子尚淺，賽前試過兩次大閘表現不俗，而陣上展現好高嘅天生速度，但其實未盡成熟，雖然今季仍有持續上升空間，但佢更在意下季長線發展，因為未來幾個月對於馬匹骨架長成或是心智方面相當關鍵。由於「快靚旺」今場贏得易，下仗隨時會於三班見面，方嘉柏笑言希望加5至6分，但能夠一出即勝，證明馬匹潛力相當高。 馬主之一劉錫康表示「快靚旺」係方嘉柏購入，冇諗過一出即勝，但愛駒兩課試閘試得好，進度正面，磅位又啱，今次贏馬時間好感到滿意，下仗應該會增程競逐。 https://racing.hkjc.com/racing/information/Chinese/Racing/LocalResults.aspx?RaceDate=2025/03/02&Racecourse=ST&RaceNo=1